'రూలర్'గా 'షేక్' చేయించనున్న బోయపాటి !

'దమ్ము' సినిమాతో మరోసారి తన సత్తా చాటుకున్న బోయపాటి తన స్పీడు మరింత పెంచినట్టు కనిపిస్తోంది. 'దమ్ము' తెచ్చిన టాక్ తో ఆయన మహేష్ బాబు - రామ్ చరణ్ లతో సినిమాలను చేసేందుకు మరింత ఉత్సాహాన్ని చూపిస్తున్నారు. ఈ నేపథ్యంలోనే ఆయన 'షేక్' ... 'రూలర్' అనే టైటిల్స్ ని హైదరాబాద్ ఫిల్మ్ చాంబర్ లో రిజిస్టర్ చేయించినట్టు తెలుస్తోంది. ప్రస్తుతం మహేష్ బాబు ఇమేజ్ కి తగిన కథని రెడీ చేసుకున్న బోయపాటి, ఆ సినిమాకి 'రూలర్' అనే టైటిల్ ని ఖరారు చేసుకున్నట్టు చెబుతున్నారు. 'దమ్ము' సినిమాలో 'రూలర్ ... 'అంటూ సాగే పాట ఆడియన్స్ లోకి దూసుకెళ్లింది. దాంతో తన తదుపరి సినిమాకి ఆ టైటిల్ పెట్టుకుందామని ఆ చిత్ర నిర్మాత అలెగ్జాండర్ వల్లభ అనుకున్నాడట. అయితే ఈలోగా అతనికంటే ముందుగానే ఈ టైటిల్ ని బోయపాటి రిజిస్టర్ చేయించి వల్లభకి షాక్ ఇచ్చాడని అంటున్నారు. యువతరం కథానాయకులతో వరుస హిట్లు కొట్టడానికి బోయపాటి చేస్తోన్న ప్రయత్నాలు ఎంతవరకూ ఫలిస్తాయో చూడాలి.